Sardigna: Luna…femina amada, di G. Curreli

Sunt pro me’ sos diligos umores

 chi semenas in terra dae su chelu,

 o cando a sero imboligas su velu 

chi ti ‘estis de candidos lugores.. 

E succedit chi pius e pius t’adoro,

si suspiras cun alinos d’ ‘eranu

faghendeti puzone pili canu 

o cun sa conca tinta in abba ‘e oro. 

Ses luna, ses amore, ses arcanu 

fastizu chi a su coro non dat pena , 

non dolore o tristura, ma sulena

fritza chi addurat fin’a su manzanu. 

Deo ti miro che amena visione,

mundu de passiones e sentidos,

ue s’ istant sos palpitos unidos

de chie hat sa matessi intescione.

E tue ses sentidu ‘e custos annos

pagu seguros, pienos de paura, 

chi dant a totogantos sepoltura 

sos giovaniles timidos ingannos. 

Como sos ammentos sunu mannos 

e curtzos sos camminos de s’ispera, 

como non torrat pius cudda chimera 

chi faghet olvidare pena e dannos. 

Falas imprateada e mi conchistas, 

dae sas alturas de su firmamentu, 

ses femmina, ses astru, ses cuntentu, 

ses luna, ses lentore ‘e pipiristas. 

Ses mistura de amore e de turmentu, 

candore ‘e nie, e umore pius nieddu, 

ses s’iscuru e ses lughente isteddu, 

passione tzega, e basciu traimentu. 

Femina, luna, isteddu in notte iscura, 

lughe de donzi umanu patimentu 

de vida ses su male e su cuntentu, 

su dolore prus mannu e s’ermosura. 

Gesuino Curreli, Sardigna